Ambrosius, De Tobia, § 81
| 1 | deinde non cogitas humilitatem et uerecundiam postulantis? donec accipias, oscularis manus faeneratoris superbi, humilias uocem tuam, ne clarior sonitus uocis tuae auris eius offendat, ne plures te audiant deprecantem. |
| 2 | paupertas non habet crimen, nulla indigentiae infamia est, sed debere uerecundum est, non reddere inuerecundum. |
| 3 | postulabis dilationem, cum coeperis conueniri in tempore praescriptae solutionis: pro pecunia adferes taedia, causaberis de tempore, excusationes strues et, cum totum promiseris, ne in uniuersum fraudare uidearis, uix dimidium restitues. |
| 4 | de amico inimicum facies,. |
| 5 | pro honore referes contumeliam, pro benedictione maledictum. |
| 6 | quam haec opinionem laedant considera, quam a uiro bono discrepent recognosce. |